O‘zbekiston professional futbol ligasi noyabr oyining 3ta nominasiya bo‘yicha g‘oliblarini e’lon qildi. E’tiborli tomoni, barcha sovrinlar "Nasaf" vakillariga nasib etdi.
Noyabr oyining eng yaxshi murabbiyi sifatida "Nasaf" ustozi Ro‘ziqul Berdiyev tan olindi. "Ajdarlar" o‘tgan oyda Superliga doirasida 4ta o‘yinda maydonga tushib, 2ta g‘alaba, bitta durang va bitta mag‘lubiyat qayd etishdi. Jumladan, qarshiliklar "Paxtakor" va "Bunyodkor" ustidan muhim g‘alabalarni qo‘lga kiritib, o‘z tarixlarida uchinchi marta O‘zbekiston chempionatida kumush medallarga ega chiqishdi.
"Nasaf" yarim himoyachisi Marko Stanoyevich esa noyabr oyida Superliganing eng yaxshi futbolchisi deb topildi. Serbiyalik futbolchi o‘tgan oyda 4ta o‘yinda maydonga tushib, 2ta gol urdi.
Stanovich tomonidan "Bunyodkor" darvozasiga jarima zarbasidan urilgan gol noyabr oyining eng chiroyli goli deb topildi.
