Coca Cola Superligasi ushbu mavsumi yakuniga yetganidan xabaringiz bor. Mavsum davomida O‘zPFL oyning eng yaxshi futbolchisi, murabbiyi va golini aniqlab keldi. Yil yakunida esa, an’anaga ko‘ra turli nominasiyalarda eng yaxshilarni aniqlaydi. 

O‘zPFL bu yilgi mavsum yakunida bir nechta nominasiyalar bo‘yicha eng yaxshilarni aniqlash tizimiga biroz o‘zgartirish kiritdi. Oldingi mavsumlarda yil laureatlarini aniqlashda ularning oyma-oy to‘plagan ochkolari yig‘indisi hisobga olinar edi. Bu yil eng yaxshilarni aniqlash uchun yakunda ham Coca Cola Superligasi klublari bosh murabbiylari va sardorlari hamda muxlislar ovozi hisobga olindi. Bunda mavsum davomida oy g‘oliblari sifatida eng ko‘p ochko to‘plagan uch nafar murabbiy va futbolchiga O‘zPFL nomzodlari qo‘shilgan holda – jami 4 nafar nomzod ishtirok etishini avvalroq xabar qilgan edik.

Hozirga kelib, barcha nominasiyalar uchun murabbiylar va sardorlar ovozlari berib bo‘lindi. Ovozlar hisoblanib, eng yaxshilar orasida kuchli uchlik aniqlandi. 

Mirjalol Qosimov (AGMK) — 26 ta o‘yin – 14 ta g‘alaba, 7 durang, 5 mag‘lubiyat – Uchinchi o‘rin

Ro‘ziqul Berdiyev (“Nasaf”) — 26 ta o‘yin – 15 ta g‘alaba, 8 durang, 3 mag‘lubiyat – Ikkinchi o‘rin

Shota Arveladze (“Paxtakor”) — 26 ta o‘yin – 21 ta g‘alaba, 2 durang, 3 mag‘lubiyat - Chempion

G‘olib yil yakunida eng yaxshilarni taqdirlash marosimida e’lon qilinadi.