«Hokim Kubogi»ning 2-turidan o‘rin olgan «Bunyodkor» - «Turon-2» (3:2) uchrashuvidan keyin toshkentliklar murabbiyi Marat Miftaxuddinovning fikrlari bilan qiziqdik.
- Taxmin qilganimdek bo‘ldi. «Turon» bugun aralash tarkibning xizmatidan foydalandi. Bunga tayyor edim. Rejaga ko‘ra, birinchi bo‘limda yosh o‘yinchilarni maydonga tushirib, ikkinchi taymda tajribali futbolchilar hisobiga o‘yinni kuchaytirmoqchi edim. Hammasi reja asosida ketdi. Darvozabonimizning xatosini inobatga olinmasa tanaffusga g‘olib bo‘lib yo‘l olishimiz kerak edi, ammo bo‘limni mag‘lub holda yakunladik. Zaxiradan maydonga tushgan tajribali futbolchilar jamoamiz o‘yinini kuchaytira oldi va irodali g‘alabani qo‘lga kiritdik. Bugun qaysidir ma’noda taktik futbolga guvoh bo‘ldik.
Kecha aytganimdek, biz musobaqa orqali yangi mavsumga ham tayyorgarlik ko‘ryapmiz. Albatta murabbiy sifatida kubokni qo‘lga kiritishni istayman, biroq Superligani ham unutmaslik zarur. Shuning uchun Farg‘onaga kelganimizdan beri futbolchilarga dam berayotganimiz yo‘q. Xususan, ertaga ham ikki mahal mashg‘ulot o‘tkazamiz. Bu orqali albatta yigitlarga og‘ir yuklamalar beramiz. Shuning uchun uchrashuv davomida futbolchilarning harakatida og‘irlik sezilishi mumkin. Buni to‘g‘ri qabul qilish kerak.
