Mamlakat milliy chempionatining 2-turda "Metallurg" o‘z maydonida Toshkentning "Bunyodkor" jamoasini qabul qiladi. Uchrashuv 16 mart kuni soat 18:30 da “Metallurg” markaziy stadionida boshlanadi.

Mazkur jamoalar shu kunga qadar o‘zaro 30 marotaba kuch sinashishgan. Natijalar poytaxtliklar foydasiga. Toshkentliklar 23 ta o‘yinda g‘alaba qozonishgan. 3 ta o‘yinda “Metallurg”ning qo‘li baland kelgan. 4 ta uchrashuvda esa durang qayd etilgan.

To‘plar nisbati-59:24. O‘tgan mavsum “Bunyodkor” har ikkala uchrashuvda “Metallurg”ni taslim qilgandi. “Qaldirg‘ochlar” mezbonlik qilgan o‘yinda Nurillo To‘xtasinov kiritgan ikkita gol o‘yin taqdirini hal etgan bo‘lsa, Bekoboddagi uchrashuv dramatik kurashlarga boy bo‘lgandi.

“Bunyodkor” safarda 3:2 hisobida zafar quchib, muhim 3 ochko bilan ortga qaytgan. Xurshid G‘iyosov hamda Mirjahon Mirahmatovning dubliga bekobodliklardan Shahzodbek Ubaydullayev hamda Zohid Abdullayevlar aniq zarbalari bilan javob qaytarishgandi.