Мамлакат миллий чемпионатининг 2-турда "Металлург" ўз майдонида Тошкентнинг "Бунёдкор" жамоасини қабул қилади. Учрашув 16 март куни соат 18:30 да “Металлург” марказий стадионида бошланади.

Мазкур жамоалар шу кунга қадар ўзаро 30 маротаба куч синашишган. Натижалар пойтахтликлар фойдасига. Тошкентликлар 23 та ўйинда ғалаба қозонишган. 3 та ўйинда “Металлург”нинг қўли баланд келган. 4 та учрашувда эса дуранг қайд этилган.

Тўплар нисбати-59:24. Ўтган мавсум “Бунёдкор” ҳар иккала учрашувда “Металлург”ни таслим қилганди. “Қалдирғочлар” мезбонлик қилган ўйинда Нурилло Тўхтасинов киритган иккита гол ўйин тақдирини ҳал этган бўлса, Бекободдаги учрашув драматик курашларга бой бўлганди.

“Бунёдкор” сафарда 3:2 ҳисобида зафар қучиб, муҳим 3 очко билан ортга қайтган. Хуршид Ғиёсов ҳамда Миржаҳон Мираҳматовнинг дублига бекободликлардан Шаҳзодбек Убайдуллаев ҳамда Зоҳид Абдуллаевлар аниқ зарбалари билан жавоб қайтаришганди.