Coca Cola Superliganing 2-turidan o‘rin olgan «Metallurg» - «Bunyodkor» (1:0) uchrashuvidan keyin "qaldirg‘ochlar" ustozi Shuhrat Maqsudov o‘z fikrlari bilan o‘rtoqlashdi.

"O‘zbekiston ahlini yaqinlashayotgan Navro‘z bayrami bilan chin qalbimdan tabriklayman! O‘yin haqida fikr bildirsam, bu - futbol. Unda kimdir yutadi yoki yutqazadi. Omadi kelgan jamoa g‘alaba qozonadi. Biz o‘zimiz yaratgan vaziyatlardan foydalana olmadik, ayniqsa ikkinchi bo‘limda. Darvozamizdan kutilmaganda to‘p o‘tkazib yubordik. Bugungi o‘yin shunday o‘tishini kutgan edik. Omad raqibga kulib boqdi. Umuman olganda, shogirdlarimdan minnatdorman. Ular oxirigacha kurashishdi.

«Bunyodkor»da to‘rt yildan beri faoliyat olib boryapman. Shuning uchun jamoada bosh murabbiy o‘zgargan bo‘lsa-da, o‘yin uslubi o‘zgargani yo‘q. Jamoaga yangi kelganimda boshqa gap edi", — dedi Shuhrat Maqsudov.