"Neftchi" bosh murabbiyi Ilhomjon Mo‘minjonov O‘zbekiston kubogi doirasida bo‘lib o‘tgan "Xorazm"ga qarshi o‘yin (3:1) borasida o‘z fikrini bildirib o‘tdi.

"Kubok bahslarining 2-turida g‘alabaga erishdik. Shogirdlarimdan minnatdorman. Qo‘llagan taktika va rejalarimiz bugungi o‘yinda o‘z ifodasini topdi. Birinchi turda "Sho‘rtan" jamoasini mensimagan holda o‘yinni oldindan yutdik deb maydonda harakatlandik, shuning natijasida mag‘lubiyatga uchradik deb hisoblayman. Bugun esa muxlislarimiz ko‘z o‘ngida yutishimiz shart edi. Chunki, guruhdan chiqishimiz kerak. Kubok uchrashuvlarida futbolchilarimizning guruhdan chiqib, Superliga klublari bilan o‘yinda o‘zlarini sinab ko‘rish istagi juda yuqori. Bugungi gollar individual mahorat evaziga kiritilgan bo‘lib, bellashuvda g‘alaba qozondik. Farg‘onalik muxlislarni bugungi g‘alaba bilan tabriklayman.

Chempionatning 5ta o‘yinidagi tarkibimiz bir xil ko‘rinishda edi. Kubok bahslarida esa zaxirada qolib ketayotgan futbolchilarimizga o‘yin amaliyotini berdik. Birinchi turda yaxshi o‘yin namoyish etishmagan bo‘lsada, bugun baribir ular g‘alaba qozonishdi. To‘g‘ri, bugun 3-4ta asosiy tarkib o‘yinchilarimizni ham tushirdik. "Qizilqum" bilan bo‘lib o‘tadigan bellashuvga chempionat bahslarida harakatlangan futbolchilardan foydalanishimiz mumkin. Chunki, bu o‘yin "Dinamo"ga qarshi kechadigan bahs oldidan tayyorgarlik vazifasini o‘tab beradi.

Sherzod Karimov mahoratli o‘yinchi. Unda kichik jarohat bor edi. Bugungi kunda jarohatidan 90 foizga xalos bo‘lgan. Lekin, baribir uni o‘yinga jalb etdik. Shu orqali uning jismoniy holati tiklanib, keyingi uchrashuvlarga tayyor bo‘ladi va jamoamizga yordam beradi degan umiddaman.

Akbar To‘rayev "Aral Samali" bilan o‘yin oldidan jarohat olgan. Hozirda asta-sekin tiklanib bormoqda. Bugungi bellashuvda ham o‘yinga tushirishimiz mumkin edi. Ammo, unga mashg‘ulotlar berdik va keyingi o‘yinlarda uni albatta tarkibda kiritamiz", — dedi Mo‘minjonov.

"Neftchi" matbuot xizmati