«Yuventus» bosh murabbiyi Andrea Pirlo «Udineze»ga qarshi o‘yindan oldin o‘z fikrlarini bildirdi.
«Krishtianu Ronaldu hujumda Dibala bilan juftlikda o‘ynaydi, chunki Morata o‘zining eng yaxshi formasida emas. U mashg‘ulotlarda xotirjam va yaxshi.
Rahbariyat bilan gaplashdim. Biz uchun muhim palla kelganini tushunib turibmiz. 15 ochkolik o‘yinlar va Italiya kubogi bahsi bor. Barcha o‘yinlar muhim ahamiyatga ega. Kelayotgan o‘yinlarga bor e’tiborni qaratganmiz.
Ancha yillardan beri futbol olamidaman va oshkoralik nimaligini yaxshi bilaman. Bu mening o‘g‘lim bilan bo‘lganidan juda afsusdaman, chunki uning ushbu vaziyatga aloqasi yo‘q. Lekin, u klaviatura ortiga berkinib olganlarga e’tibor bermasligi kerak. U faqat oldinga qarashi lozim», — dedi Pirlo.
Bir necha kun oldin 17 yoshli Nikolo Pirlo «Yuventus»ning omadsiz o‘yini sabab unga o‘lim bilan tahdid qilishganini ma’lum qilgandi.
Turin klubi ertaga, 2 may kuni «Udineze»ga qarshi o‘ynaydi. Uchrashuv Toshkent vaqti bilan 21:00da boshlanadi.
