"Neftchi" bosh murabbiyi Ilhomjon Mo‘minjonov Pro liganing navbatdagi turi doirasida "Oqtepa"ga qarshi bo‘lib o‘tgan o‘yin (7:0) borasida o‘z fikrini bildirib o‘tdi.
 
"Bugungi g‘alaba bilan barcha muxlislarimizni tabriklayman. Bugun futbolchilarimiz borlarini berib, yurakdan chiqarib mahoratli o‘yin ko‘rsatishdi.

Ulug‘bek Hoshimov bilan Ruslan Roziyev bugungi kunda Olimpiya terma jamoasi a’zolari hisoblanishadi. Shu tufayli ular termaga jalb etilib, xalqaro musobaqada qatnashish uchun safarga yo‘l olishgan. «Buxoro» bilan bo‘lib o‘tadigan o‘yinda ham ishtirok eta olishmaydi. To‘g‘ri, bugungi o‘yinda ularning yo‘qligi bilindi. Ammo, hozirda zaxiramiz yaxshi futbolchilardan tashkil topgan. Masalan, Sardor Abdunabiyev yosh va mahoratli futbolchilarimizdan biri. U o‘zini ijobiy tomondan namoyon qildi va bugungi o‘yinda 5 ta to‘p kiritib, hammamizni xushnud etdi.

Qolgan futbolchilarimizga ham bugun imkoniyat berdik. Lekin zaxiradan maydonga tushgan o‘yinchilar imkoniyatdan unumli foydalanishdi deb aytolmayman. O‘ylaymanki, keyingi «Buxoro» klubi bilan bo‘lib o‘tadigan o‘yinga jiddiy tayyorgarlik ko‘ramiz. Chunki, «Buxoro» jamoasi bugungi kunda yaxshi shakllangan jamoa hisoblanadi.

Qolgan o‘yinlarda ham g‘alaba qozonib, ochko olishda davom etamiz", - deydi "Neftchi" bosh murabbiyi.

«Neftchi» matbuot xizmati