Shimoliy Koreya (KXDR) terma jamoasining Jahon Chempionati—2022 va Osiyo Kubogi—2023 saralash bosqichidan chiqarilgani haqida xabar berilgandi.

Alisher Nikimbayev o'z telegram kanalida aytishicha, FIFA KXDRning saralashdan chiqarilgani sababli Osiyo qit’asi saralash bosqichi reglamentiga o‘zgartirish kiritgan.

Unga ko‘ra H guruhida ishtirok etgan KXDR terma jamoasining saralashni davom ettira olmasligi bois uning oldingi natijalari bekor qilingan. Shu sababli Turkmaniston terma jamoasi 3 ochkodan mahrum bo‘lgan va guruhda birinchi o‘rindan uchinchi pog‘onaga tushib ketgan.

Endilikda Osiyo qit’asida barcha guruhlardagi eng yaxshi ikkinchi o‘rinni olgan jamoalarni aniqlashda ularning beshinchi (so‘nggi) pog‘onani egallagan terma jamoalar bilan o‘yinlari natijasi bekor qilinadi.

Vadim Abramov boshchiligidagi O‘zbekiston milliy terma jamoasi hozirda 9 ochko bilan guruhda ikkinchi o‘rinda bormoqda. Peshqadam Saudiya Arabistoni hisobida esa 11 ochko bor. O‘zbekiston 5-o‘rindagi Falastin bilan ikkita o‘yinini ham o‘tkazib bo‘lgan va ularning faqat bittasida g‘alaba qayd etilgan (birida mag‘lubiyat).

Agar Saudiya Arabistonida bo‘lib o‘tadigan markazlashgan musobaqada O‘zbekiston uchala o‘yinda ham g‘alaba qozonsa, 18 ochko bilan guruhda birinchi o‘rinni egallab keyingi bosqichga chiqadi. Ikkinchi o‘rin olinadigan bo‘lsa Singapur va Yamanning (ikkinchi o‘yinlarda ham) mag‘lub etilishi ehtimolini hisobga olib aytganda Falastinning 5-o‘rinni egallashi O‘zbekiston uchun manfaatliroq bo‘ladi.

O‘zbekiston terma jamoasining saralash bosqichida Singapur (7 iyun), Yaman (11 iyun) va Saudiya Arabistoniga (15 iyun) qarshi o‘yinlari qolgan.