Bu yil Amerika Kubogi ham bo‘lib o‘tishi lozim. Bu ham 2020 yildan ko‘chirilgan turnir. Sabablar o‘sha-o‘sha – koronavirus!

Avvalboshdan turnir Kolumbiya va Argentinada o‘tishi lozim edi. Biroq Kolumbiyadagi siyosiy vaziyat bois bu mamlakat “o‘yin”dan chiqib ketdi. O‘tgan oy Argentinadagi pandemik vaziyat jiddiylashib ketishi ortidan bu mamlakat ham mezbon maqomida ayrildi.

Favqulodda holat – musobaqa bor-u, mezbon yo‘q. Bunday vaqt xalqaro sport turnirlarini o‘zida qabul qilib ko‘zi pishib ketgan Braziliya katta sahnaga chiqib mezbonlikni qabul qilib oldi. Darvoqe, 2019 yilda ham bu qit’aning eng muhim turniri shu yerda o‘tgandi.

CONMEBOL musobaqadagi barcha futbolchilar-u, murabbiylar hamda ishtirokchilar koronavirusga qarshi emlangan bo‘lishini asosiy talab sifatida qo‘ymoqda. The Guardian nashrining yozishicha, Xitoyning Sinovac kompaniyasi vaksiyanalari turnir tashkilotchilariga yetib kelishiga Lionel Messi asosiy sababchilardan biri bo‘ldi. Gap shundaki, Xitoy tomoni bilan vaksina bo‘yicha muzokaralar vaqtning o‘ta tig‘iz ekani bois berk ko‘chaga kirib qolgandi. Ayni shu vaqt Leo dastxati tushirilgan 3 futbolkani Sinovac kompaniyasi rahbariyatiga yuboradi. Bunday tuhfadan o‘zgacha ruhlangan xitoyliklar jarayonni tezlatishga va 50 000 dona vaksinani o‘z vaqtida yuborishga vada berishgan.

Adolat o‘rnida Messining o‘zi bu ma’lumotni tasdiqlamaganini ham aytib o‘tish lozim, ammo u buni inkor ham etmagan. Janubiy Amerika OAV esa bu haqda juda ko‘p xabarlarni tarqatishmoqda.

Orif Tolipov