Superliganing 10-tur markaziy o‘yinida "Paxtakor" Toshkentda "So‘g‘diyona"ni qabul qiladi.

Joriy mavsum Superligada hali mag‘lubiyatga uchramagan va turnir jadvalida dastlabki ikki pog‘onani egallab turgan jamoalar - "Paxtakor" va "So‘g‘diyona"ning o‘zaro to‘qnashuvi birinchi davradagi eng ahamiyatli bellashuvlardan birini taqdim etadi. Shu sababli mazkur bahsning keskin kechishini kutish mumkin. Toshkentliklar safida diskvalifikasiya sababli mazkur bahsni Dragan Cheran o‘tkazib yuboradi.

Milliy chempionatlar doirasida o‘zaro 50 uchrashuv bo‘lib o‘tgan. 41 bellashuvda jamoamiz g‘alabaga erishgan bo‘lsa, 4ta o‘yinda durang qayd etilgan va 5 bahsda raqibning g‘alabasi qayd etilgan. 125 gol urgan "Sherlar" o‘z darvozasidan 39 to‘p o‘tkazib yuborishgan. "Paxtakor"ning eng yirik g‘alabalari 6:1 va 5:0 hisoblarida kuzatilgan. Toshkentdagi 25 bahsning 23tasida mezbonlar zalaba qoonishgan. Shundan 12 g‘alaba yirik natija bilan qo‘lga kiritilgan. O‘z maydonida "Paxtakor" 90 gol urib, 18 to‘p o‘tkazib yuborgan. Faqat bir martadan jizzaxliklar yutug‘i va durang qayd etilgan. 1995 yildan beri "So‘g‘diyona" safar o‘yinlarida ochko olmagan.

"Paxtakor" va "So‘g‘diyona" jamoalari o‘rtasidagi o‘yin 19 iyun, shanba kuni soat 20:00da "Paxtakor" stadionida boshlanadi.