Coca Cola Superligasining 14-turidan o‘rin olgan bahsda “Navbahor” safarda Jizzaxning “So‘g‘diyona” jamoasi mehmoni bo‘ladi.

Mazkur jamoalar O‘zbekiston chempionatlarining  Cuperliga (oliy liga)sida o‘zaro 51 marta uchrashishgan. Ushbu o‘yinlarning 25 tasida “Navbahor”  g‘alaba qozongan bo‘lsa, “So‘g‘diyona” 19 ta bahsda zafar quchgan, 7ta o‘yinda durang qayd etilgan. To‘plar nisbatidagi ko‘rsatkich 88-59, “Navbahor”foydasiga.

Namanganliklar o‘zaro o‘yinlarda 82 ochkoni qo‘lga kiritishgan bo‘lsa, jizzaxliklar hisobida 64 ochko mavjud.

“Navbahor” – “So‘g‘diyona” klublari o‘rtasidagi o‘zaro uchrashuvlardagi eng yirik hisob 1996 yili qayd etilgan. O‘shanda namanganliklar o‘z uylarida jizzaxliklar darvozasiga 7ta javobsiz to‘p kiritishgandi.

Sermahsullik borasida esa 2000 va 2014 yillardagi uchrashuvlar tarixda qolgan. E’tiborlisi, o‘sha o‘yinlarda darvozalarga to‘qqiztadan gol urilgan. 2000 yili Namanganda bo‘lib o‘tgan uchrashuvda mezbonlar 6:3 hisobida zafar quchishgan bo‘lsa, 2014 yili Jizzaxda o‘tkazilgan bahsda “So‘g‘diyona” 5:4 hisobida g‘alaba qozongandi.

Jizzaxda shu paytgacha bo‘lib o‘tgan 25 bahsning 18 tasida mezbonlar g‘alaba qozonib, 3ta uchrashuvda durangga imzo chekishgan hamda 4ta bahsda mag‘lubiyatga uchrashgan.

Ushbu jamoalarning Namanganda bo‘lib o‘tgan birinchi davradagi uchrashuvida jizzaxliklar Shohruz Norxonovning goli evaziga 1:0 hisobida zafar quchishgandi.

Eslatib o‘tamiz, “So‘g‘diyona” – “Navbahor” o‘yini 8 avgust kuni Olmaliqdagi OKMK sport majmuasida soat 20:00 da start oladi.

“Navbahor” PFK matbuot xizmati.