"Sherlar" Superliganing 21-turida Qo‘qonda "Qo‘qon-1912" mehmoni bo‘lishadi.

Bu ikki jamoa o‘rtasidagi Qo‘qon o‘tadigan o‘yinlari hamisha keskin va qiziqarli tarzda o‘tadi. Ishqibozlarni bu safar ham ajoyib o‘yin kutib turibdi.

Bellashuvni diskvalifikasiya bilan o‘tkazib yuboradigan futbolchilar ikkala jamoa tarkibida ham mavjud emas.

"Qo‘qon-1912"ga qarshi chempionatlarda o‘tgan 31 bahsning 19tasida "Paxtakor" zafar quchgan. 7 o‘yinda durang qayd etilgan bo‘lsa, 5 marta raqib g‘alaba qozongan. Raqib darvozasini 82 marta ishg‘ol qilgan jamoamiz 41 gol o‘tkazib yuborgan.

Qo‘qonliklar mezbonligida o‘tgan  uchrashuvlarda esa vaziyat shunday: 5 g‘alaba, 4 mag‘lubiyat va 6 durang. Safardagi o‘yinlarda paxtakorchilar 25 to‘p kiritib, 23 gol o‘tkazib yuborgan.  "Paxtakor" 2003 yildan keyin mehmonda o‘tgan 6 o‘yinda mag‘lubiyatga uchramagan. O‘tgan yili "Sherlar" mehmonda 3:1 hisobida g‘alaba qozonishgan.

"Qo‘qon-1912" va "Paxtakor" jamoalari o‘rtasidagi bahs 1 oktyabr, juma kuni Qo‘qondagi "Markaziy" stadionda soat 16:00da boshlanadi.