Rossiya Federasiyasining Qozon shahrida o‘tkazilgan sambo bo‘yicha «Tatariston Respublikasi Prezidenti kubogi» xalqaro turnirida mamlakatimiz sambochilari ham munosib ishtirok etishdi va yurtimizga uchta medal bilan qaytib kelishdi.
To‘rtinchi marotaba tashkil etilgan ushbu musobaqada dunyoning 15 mamlakatidan 207 nafar sportchi sovrinli o‘rinlar uchun kurash olib borishdi. Quvonarlisi, xalqaro turnir yakuniga ko‘ra, uch nafar sambochimiz sovrindorlar safidan joy oldi.
Jumladan, -79 kg vazn toifasida yurtimiz sharafini himoya qilgan Firdavs Xojimamatov finalgacha yetib bordi va kumush medalga sazovor bo‘ldi. -98 kg vaznli sambochimiz Ne’mat Yoqubov ham musobaqaning kumush medali egasiga aylandi. Jangovar sambo bahslarida esa -71 kg vazn toifasida ishtirok etgan hamyurtimiz San’at Ismanov yurtimizga bronza medali bilan qaytib keldi.
