O‘zbekiston milliy jamoasi JCH-2022 saralash bosqichidan chiqib ketgach, o‘z ishtirokini Osiyo kubogi-2023 yo‘llanmasi uchun davom ettiradigan bo‘lganidan xabaringiz bor.

JCH-2022 yo‘llanmasi uchun kurashni davom ettirayotgan 12ta jamoa va Qatar termasi Osiyo kubogi yo‘llanmasini naqd qilib bo‘lishgan. Qolgan 11ta yo‘llanma uchun esa alohida saralash bosqichi o‘tkaziladi. Shu paytgacha saralash bosqichi qanday tartibda o‘tkazilishi noma’lum bo‘lib turgandi.

Osiyo futbol konfederasiyasi Osiyo kubogi-2023 saralash bosqichi markazlashgan holda o‘tkazilishini ma’lum qildi. Guruh bahslari 8, 11 va 14 iyun kunlari bo‘lib o‘tadi. Ya’ni guruh bosqichida jamoalar 2 martadan emas, bir martadan to‘qnash kelishadi.

Qur’a natijasida 24ta terma jamoa 4tadan 6ta guruhga taqsimlanadi. Guruh g‘oliblari va ikkinchi o‘rinni egallagan orasida eng yaxshi ko‘rsatkichga ega bo‘lgan 5ta jamoa Osiyo chempionati yo‘llanmasiga ega bo‘ladi.

Eslatib o‘tamiz, Osiyo kubogi musobaqasi 2023 yilning 16 iyunidan 16 iyuliga qadar Xitoy mamlakatida o‘tkaziladi.