Belgiya terma jamoasi bosh murabbiyi Roberto Martines so‘nggi paytlarda «Real»da deyarli o‘yin amaliyotiga ega bo‘lmayotgan hujumchi Eden Azar uchta o‘yinda 12 daqiqa maydonga tushgani haqida o‘z fikrlari bilan o‘rtoqlashdi.
«Biz Azar bilan bunday vaziyat bo‘lishini kutmagan edik. Tibbiyot nuqtai nazaridan Eden yaxshi holatda. U formada bo‘lish uchun qo‘shimcha mashg‘ulotlar o‘tkazadi va yuqori saviyaga qaytishga harakat qiladi. Lekin Azar futboldan zavqlanishni to‘xtatib qo‘yishidan qo‘rqaman», - deya Martines so‘zlarini keltirdi Mundo Deportivo.
Madridning «Real» klubi Azarni 2019 yilning yozida «Chelsi»dan 115 million yevroga sotib olgandi.
Joriy mavsumda 30 yoshli hujumchi qirollik klubi safida 11 o‘yin o‘tkazib, bitta golli uzatmani amalga oshirgan. Uning klub bilan shartnomasi 2024 yilning yoziga qadar amal qiladi.