Mavsumlar oralig‘idagi tanaffus paytida har bir jamoa tarkibida o‘zgarishlar  bo‘lishi tabiiy. Albatta, “Navbahor” ham bundan mustasno emas.

Kecha “lochinlar” safini 3 nafar futbolchi tark etganligi borasida xabar bergandik va ularning ikkisi legioner edi. Bugun klub hamda futbolchi o‘rtasidagi ikki tomonlama kelishuvga asosan, jamo tarkibini yana bir legioner, ya’ni, braziliyalik 27 yoshli yarim himoyachi Kosta Tenorio Guttiner tark etdi.

“Navbahor” tarkibiga yozgi transfer paytida qo‘shilgan Guttiner «Navbahor» safida 12 ta o‘yinda maydonga tushib, 463 daqiqa harakat qildi va bitta golga mualliflik qilgan holda, yana bitta golga “pas” berdi.

Ta’kidlash joizki, Coca Cola Superligasining 16-turidan o‘rin olgan “Nasaf” – “Navbahor” uchrashuvida aynan braziliyalik yarim himoyachining yagona goli evaziga “lochinlar” Qarshidan g‘alaba bilan qaytishgandi.

“Navbahor” PFK Kosta Guttinerga jamoamizdagi faoliyati uchun  o‘z minnatdorchiligini bildiradi hamda futbolchining keyingi faoliyatida omad yor bo‘lishini tilab qoladi.

“Navbahor” PFK matbuot xizmati.