Ayni kunlarda yengil atletika bo‘yicha O‘zbekiston terma jamoasi poytaxtimiz va Toshkent viloyatining Dukent maskanida o‘quv-mashg‘ulot yig‘inini olib bormoqda. Poytaxtimizda 14 nafar sportchi yig‘inda qatnashayotgan bo‘lsa, terma jamoamizning 11 nafar asosiy vakillari “Yangiobod sport bazasi”dagi mashg‘ulotlarda ishtirok etmoqda. Yilning dastlabki yig‘ini bo‘lgani bois murabbiylar asosan jismoniy tayyorgarlikni kuchaytirishga e’tibor qaratishgan.
Bugun MOQ rahbari Rustam Shoabdurahmonov poytaxtimizdagi yengil atletika markaziga tashrif buyurib, u yerda o‘quv-mashg‘ulot yig‘inini olib borayotgan sportchilarimiz bilan uchrashdi. Tashrif davomida federasiya mutasaddilari va terma jamoamiz bosh murabbiyi Go‘zal Hubbiyeva MOQ raisiga olib borilayotgan yig‘in haqida batafsil ma’lumot berdi.
MOQ rahbari tashrif davomida Markazda shug‘ullanayotgan atletlar bilan ham yuzma yuz suhbatlashib, ularning yangi mavsumda oldilariga qo‘ygan rejasi, maqsadlari haqida fikr almashdi. Shuningdek, federasiya mutasaddilariga sportchilarning kamchiliklarini o‘rganish, ular uchun barcha sharoitlarni yaratish, mashg‘ulotlarni uzliksiz davom ettirish bo‘yicha ko‘rsatma berdi.
