Joze Mourinyo O‘zbekiston milliy terma jamoasi va “Roma” klubi hujumchisi Eldor Shomurodovning o‘yinini tanqid qilgani haqida avval xabar bergandik. “Roma”ning portugaliyalik mutaxassisi Eldorning “Yuventus”ga qarshi o‘yindagi o‘yinidan norozi bo‘ldi.
Joze o‘tkazib yuborilgan golda Shomurodovni aybladi. Murabbiy futbolchining hujumdagi harakatlaridan ham norozi edi.
Sport nashrlari xabariga ko‘ra, “Roma” rahbariyati ham Jozening natijalaridan noroziligini bildirmoqda. Rahbariyat portugaliyalik mutaxassis yozda katta transfer kampaniyasidan so‘ng yaxshi natija ko‘rsatishi kerak, deb hisoblamoqda. Shuningdek, “Roma” Eldor Shomurodovning holatidan norozi. Klub 20 million yevrolik futbolchi zaxira o‘rindig‘iga o‘tirmasligi kerak deb hisoblamoqda.
Rahbariyatning fikricha, Joze Eldordan noto‘g‘ri foydalanmoqda va unga kerakli vaqtni bermayapti. Dastlabki o‘yinlarda ko‘p gol urgan futbolchi jamoada muhim rol o‘ynamay qolganidan menejerning aybi deb hisoblashmoqda, deydi OAV.
Eslatib o‘tamiz, “Roma” 21-turdan so‘ng Italiya chempionatida 6-o‘rinni egallab turibdi. Mavsum boshida Mourinyo oldiga TOP-4 ga kirish vazifasi qo‘yilgan edi.
