Mamlakatimizning yosh va iqtidorli shaxmatchilaridan biri, xalqaro maydonlarda yurtimiz sharafini munosib himoya qilib kelayotgan Humoyun Bekmurodov yangi darajaga ko‘tarildi, u FIDE sport ustasi unvoniga sazovor bo‘ldi.

Ushbu yosh shaxmatchimiz shu kunga qadar o‘smirlar o‘rtasidagi ko‘plab musobaqalarda g‘olib va sovrindor bo‘lgan, shuningdek 2020 yilda o‘tkazilgan shaxmat bo‘yicha onlayn O‘zbekiston chempionatida ham g‘oliblikni qo‘lga kiritgan holda yakunda “Spark” avtomashinasi bilan taqdirlangan edi.

Turizm va sport vazirligi hamda O‘zbekiston shaxmat federasiyasi Humoyun Bekmurodovni ushbu muvaffaqiyat bilan tabriklaydi va tez orada xalqaro grossmeyster darajasini ham qo‘lga kiritishida omad tilaydi.

Eslatib o‘tamiz, dunyo tarixidagi eng yosh grossmeyster maqomini 2021 yil 30 iyunda hind millatiga mansub bo‘lgan amerikalik Abximanyu Mishra qo‘lga kiritgan. U atigi 12 yosh, 4 oyu 25 kunligida shaxmatdagi eng yuqori darajaga ko‘tarilgan edi. Bungacha naqd 19 yildan ziyod vaqt davomida jahonning eng yosh grossmeysteri maqomini rossiyalik Sergey Karyakin o‘z qo‘lida saqlab turgan. Shuningdek, hamyurtlarimizdan Javohir Sindarov hamda Nodirbek Abdusattorovlar ham grossmeysterlik talabini bajargan dunyodagi eng yosh shaxmatchilar safidan joy olganini alohida ta’kidlash kerak.