Madrid klubi yozgacha 25 yoshli futbolchining shartnomasi 2023 yilning iyunigacha davom etadimi yoki yo‘qligini bilmoqchi. Agar ispaniyalik futbolchi ketishga qaror qilsa, "Real" futbolchisini tekinga yo‘qotmaslik uchun uni keyingi yozda sotadi.

Asensio "Real"da qolishni istaydi, lekin maoshini oshirishni so‘ramoqda. Madridliklar esa futbolchiga hozirgidek maosh bilan 4 yillik shartnoma taklif qilmoqda - yiliga 4,5 million yevro. Maqsadlarga erishish uchun yana 1,5 million yevro bonus sifatida taqdim etiladi.

Futbolchining vakillari Angliyada unga yiliga 7 million yevrolik shartnoma taklif qilishayotganini aytishmoqda. "Real Madrid" Asensioga bunday maosh bermoqchi emas.

Markoga "Yuventus", "Bavariya", "Borussiya Dortmund" va bir qancha ingliz klublaridan takliflar bor, ular unga "Real"dan yuqori maosh taklif qilmoqda.

Agar Asensio ketishga qaror qilsa, madridliklar uning uchun taxminan 50 million yevro so‘rashadi.

Joriy mavsumda yarim himoyachi “Real” safida barcha turnirlar doirasida 28 ta o‘yinda maydonga tushib, 9 ta gol urishga erishdi.