Rossiya sport vazirligida mamlakat sport federasiyalari vakillari bilan tezkor uchrashuv tashkil etildi, deb yozmoqda «Sport-Ekspress» nashri.

Qayd etilishicha, yig‘ilishda sohaga e’tibor qaratish, taqvim rejasini belgilash, shuningdek, xalqaro turnirlarni o‘tkazish maqomi va shaklini o‘zgartirish chora-tadbirlari muhokama qilingan.

Mavjud vaziyatni muhokama qilish chog‘ida Rossiya sport tadbirlarining asosiy qismi MDH (Ozarbayjon, Armaniston, Belarus, Qozog‘iston, Qirg‘iziston, Moldova, Rossiya, Tojikiston, O‘zbekiston), shuningdek, BRIKS (Braziliya, Rossiya, Hindiston, Xitoy, Janubiy Afrika) mamlakatlariga yo‘naltirilishiga qaror qilindi.

Rossiya ot sporti federasiyasi rasmiy saytida ushbu davlatlar bilan birgalikda sport ligalarini tashkil etish bo‘yicha muzokaralar olib borilayotgani haqida xabar berilgan.

Shuningdek, futbol musobaqalarining tashkil etilishi ham aytilmoqda.

Rossiya futbol ittifoqi faxriy prezidenti Vyacheslav Koloskov MDH va BRIKS mamlakatlari bilan hamkorlikda yangi futbol musobaqasi tashkil etish yaxshi g‘oya ekani, biroq uni amalga oshirish oson bo‘lmasligini ma’lum qildi.

«Bu yaxshi, birlashtiruvchi va ilhomlantiradigan g‘oya. Unga qarshi hech narsa demoqchi emasman. Bu g‘oya yaxshi yoki yomonligini faqat amaliyot ko‘rsatadi. Biroq sport nuqtai nazaridan bunga shubham bor.

UEFA va FIFA bu musobaqaga qarshilik qilishi mumkin. Hozircha RFI va Belarus FF a’zolikdan chiqarilmagan. Biz u yerdagi qoidalarga bo‘ysunamiz. Bu kabi birlashmalar yaratish uchun FIFA va UEFA ruxsatini olish talab etiladi. Shunchaki boshlab yuborib bo‘lmaydi. Aks holda bizni a’zolikdan chiqarib yuborishlari mumkin», — deydi Koloskov.

Qayd etish kerak, ayni paytga kelib, dunyoning aksariyat xalqaro sport federasiyalari Ukrainadagi vaziyat tufayli Rossiya va Belarus sportchilarini musobaqalardan chetlatgan. Avvalroq FIFA Rossiya terma jamoasini JCH—2022 o‘tish o‘yinlaridan, UEFA esa rus klublarini Yevrokuboklardan chetlatgan edi.