Buyuk Britaniya rasmiylari, agar ularga aniq taklif tushsa, "Chelsi"ni sotish bo‘yicha yon berishlari mumkin. Bu haqda Britaniya texnologiya vaziri Kris Filipp bayonot berdi.

"Klubga berilgan lisenziyaga ko‘ra, sotishga ruxsat berilmagan. Biroq, agar xaridor paydo bo‘lsa, u yoki klub hukumat bilan bog‘lanib, savdo amalga oshishi uchun shartlarni o‘zgartirishni so‘rashi mumkin", - deya Filipp so‘zlarini keltiradi Sky News.

Eslatib o‘tamiz, sanksiyalar tufayli Roman Abramovich "Chelsi"ni sotishga qaror qilgan, biroq kecha uning aktivlari muzlatilganligi ma’lum bo‘ldi, shu bois klubni sotish mumkin emas.

"Chelsi"ning o‘zi yangi sanksiyalardan qattiq zarba oldi. "Aristokratlar"ga o‘yinlar uchun chipta sotish, transferlarni amalga oshirish va shartnomalarni yangilash taqiqlangan edi.