O‘zbekiston chempionati hamda kubok doirasida 2008 yildan buyon davom etayotgan qarama-qarshilik: AGMK - "Nasaf" to‘qnashuvida 35-bellashuv.

Hozirga qadar o‘tkazilgan 34 uchrashuvda jamoamiz 7 g‘alaba, 12 durang va 15 mag‘lubiyat qayd etgan. To‘plar nisbati: 30-49.

"Nasaf" o‘tgan mavsum Superligada 4-o‘rinni qo‘lga kiritdi. AGMK esa ketma-ket ikkinchi yil bronza medalini qo‘lga kiritdi. Chempionatda ham yonma-yon ketgan va mavsum davomida o‘zaro raqobatga kirishgan bu ikki jamoalar endilikda yangi mavsumda sovrindorlar orasida o‘zaro raqobatlashishmoqda. Ayni paytda o‘tkazilgan ikki turdan keyin ham jamoalar nisbatan o‘xshash holatda. Ya’ni har ikkala jamoa kutilmaganda mavsum startini g‘alabasiz boshladi. Shu boisdan ham bo‘lajak bahsda har ikkala jamoa final bellashuviga chiqqandek g‘alaba uchun jiddiy kurashishi aniq.

O‘yin bosh hakami etib tayinlangan Aziz Asimov 15-marotaba jamoamiz ishtirokidagi bahsda ishlaydi. Asimov boshqargan o‘yinlarda jamoamiz 5 g‘alaba, 5 durang va 4 mag‘lubiyatga uchragan.

Bo‘lajak o‘yin AGMK jamoasi uchun joriy mavsum Olmaliqdagi ilk o‘yin bo‘lgani uchun ochilish uchrashuvi sifatida o‘tkaziladi va unda stadionga tashrif buyuruvchi muxlislarni bir qator sovg‘a va qiziqarli dasturlar kutadi. Mazkur o‘yindan oldin va tanaffusda estrada yulduzi Hamdam Sobirov o‘zining xit qo‘shiqlari bilan ishqibozlarga ko‘tarinki kayfiyat ulashishi rejalashtirilgan.

O‘yin 20 mart kuni, Olmaliqdagi OKMK sport majmuasida soat 17:00da boshlanadi.