Superliga 3-turidan o‘rin olgan “Navbahor” – “Qo‘qon-1912” jamoalari o‘rtasidagi uchrashuv arafasida “lochinlar”ning 25 yoshli mahoratli yarim himoyachisi Nurillo To‘xtasinov bo‘lajak o‘yin haqidagi fikrlari bilan o‘rtoqlashdi.

-  O‘zingizga ma’lum, “vodiy derbisi” bahslari doimo murosasiz, kurashlarga boy, shiddatli  tarzda kechgan. Vodiylik bo‘lganligim bois, buni juda yaxshi bilaman.

Bu safargi o‘yin ham bundan mustasno bo‘lmaydi, albatta va qo‘qonliklar bo‘lajak uchrashuvda jamoamizga munosib qarshilik ko‘rsatishga intilishadi. 

Jamoamiz o‘tgan bahsda safarda “Surxon” ustidan g‘alaba qozonib, joriy mavsumdagi ilk yutuqni nishonladi. Bo‘lajak uchrashuvga jiddiy tayyorgarlik ko‘rdik hamda Namangandagi ilk derbida ham zafar quchib, g‘alabali odimimizni davom ettirish niyatidamiz.

Faqat mazkur o‘yinda muxlislar stadionga ko‘proq tashrif buyurib, jamoamizga bevosita ruhan va ma’nan qo‘llab-quvvatlab, madad berib turishsa bo‘lgani.

Biz – futbolchilar esa ishqibozlarning qo‘llab-quvvatlashlariga yarasha

maydonda munosib to‘p tepib, muxlislarga quvonch ulashishga intilamiz hamda g‘alaba qozonish uchun barcha imkoniyatimizni ishga solamiz.

Baxtimizga “Navbahor” ishqibozlari hamisha sog‘ bo‘lishsin.