Taniqli sharhlovchi Xayrulla Hamidov APLning 27-tur doirasida o‘tkazilgan "Arsenal" - "Liverpul" jamoalari o‘rtasidagi o‘yinga izoh berdi.

Martinelli "ManSiti"ga qarshi bahsda o‘yinni butkul boshqa tomonga o‘zgartirib yuborishi mumkin golni ura olmagani esingizdami? Jamoa ketidan qarshi hujumda qizil kartochka "sotib olgandi". Uyog‘ini bilasiz...

Bu safar ham shunday bo‘ldi. Edegorning supervaziyati, foydalana olmaslik, davomidan yarim himoyachilarning qo‘pol xatosi - Tyagoga oson pas uzatishga imkon berilishi va Ramsdeylning rasvo o‘yini...

Bo‘ldi, qolgan daqiqalarda "to‘pchilar"ning nokdaundan o‘zlariga kela olishmaganini tomosha qilavering!

Katta o‘yinlarda Arteta yigitlari hisob ochishmasa, ruhiy tomondan qiynalib qolishlari bor gap. Hali bu masalada tajriba kerak. Keyingi yillar ispan shuning ustida ishlaydi. Aniq.

Lekin natija intrigalar uchun ayni muddao bo‘ldi: "Liverpul"ning g‘alabasi chempionlik intrigasini yuqori nuqtasiga olib chiqdi. "Arsenal"ning yutqazig‘i to‘rtinchi o‘rin uchun kechadigan jangni-da olovlatib yubordi.

APLning qolgan bahslarini tasavvur qilishga qo‘rqyapman.