Superliga 3-turi doirasidagi «Dinamo» - «Qizilqum» (0:0) uchrashuvidan keyin Navoiy jamoasi bosh murabbiyi Nikola Lazarovich jurnalistlar savollariga javob qaytardi.

- Samarqanddagi o‘yin kutganimizdek juda og‘ir kechdi. Birinchi bo‘limda o‘yinni nazorat qildik, ikkinchi bo‘limda esa biroz ustunlik «Dinamo»da bo‘ldi. Gol urish uchun ikki jamoada ham imkoniyatlar bo‘ldi, ammo durang o‘yinga mos, menimcha.

- «Qizilqum» o‘yinidan va bugungi natijadan qay daraja qoniqdingiz?
- Bugun omadimiz keldi, hozir ham Superliga turnir jadvalida 1-o‘rindamiz. Shunga qaramay, biz eyforiyaga berilmaymiz, o‘yindan-o‘yinga ochko yig‘ib boramiz.

- «Qizilqum» bu o‘yin oldidan ham peshqadam, «Dinamo» esa so‘nggi o‘rinda edi. Bugun jamoangiz bir ochko qo‘lga kiritdimi yoki ikki ochko yo‘qotdimi?
- Raqiblarga qarshi o‘yin oldidan hech qachon uning qaysi o‘rinda ekaniga ahamiyat bermayman. Bugungi o‘yinda kutganimdek raqib bizga ko‘p imkon bermadi. O‘z vaziyatimizni kutdik, ammo undan foydalana olmadik. Shunday ekan, natija o‘yinga mos deyishim mumkin.

- Ya’ni, natijadan qoniqdingiz?
- Ha, albatta, durang natijadan qoniqdim. Ammo biz hali o‘z o‘yinimiz ustida yana ishlab, turdan-turga o‘sib borishimiz kerak.

- Jamoaning o‘z uyi Navoiyda o‘yin o‘tkazmayotgan klubga qanday ta’sir qilmoqda?
- Buning ta’siri bor, albatta. Doimiy safarlarda yurish oson emas.

- Raqib jamoa «Dinamo» haqida fikringiz?
- Bu haqdagi fikrimni raqib jamoadagi hamkasbim Predragga ham aytdim. «Dinamo» yaxshi jamoa, hali Superliganing ko‘p jamoalariga muammo tug‘dira oladi. Tarkibda yosh o‘yinchilar bor, ular esa o‘yin davomida o‘zlarini nimalarga qodirligini ko‘rsatishdan charchashmaydi. Ayniqsa, Samarqandda «Dinamo»ga qarshi boshqa klublarga ham oson bo‘lmaydi.