Yaqinda Braziliyada o‘ta kam-yob voqea yuz berdi: darvozabon faoliyatidagi dastlabki golini urdi, jurnalist ayol ko‘zlarini yoshlatdi, sovrinni muxlisga sovg‘a qildi.
Bejizga dunyoning tengsiz jamoasi unvoniga sazovor bo‘lmagan «qirol» Pele vatanida turli-tuman musobaqalar - shtatlar (viloyatlar) chempionatlari, kubok bellashuvlari muntazam ravishda bo‘lib turadi. Shunday turnirlarning biri bo‘lmish Nordeste kubogida mamlakatning shimoli-sharq hududida joylashgan klublar ishtirok etadilar. Unda «Seara», «Fortaleza», «Bayya» va «Sport Resifi» kabi oliy divizion vakillari va yarim professional jamoalar qatnashadi. G‘olib jamoa Nordeste kubogini qo‘lga kiritadi.
1976 yilda tashkil etilgan turnirda vaqti-vaqti bilan format va ishtirokchilar tarkibi o‘zgarib turadi. So‘nggi o‘zgarishlar 9 yil avval yuz bergandi. Nordeste kubogining e’tiborga molik jihati shundaki, g‘olib nufuzli sovrindan tashqari, Janubiy Amerika kubogi (EL kabi, qit’aning 2-darajali klub turniri) yo‘llanmasini ham qo‘lga kiritadi.
2013 yilda turnirda g‘olib chiqqan, 2016 yilda finalgacha yetib borgan «Kampinense» o‘zining 107 yillik faoliyati davomida atigi 5ta mavsumni oliy divizionda o‘tkazgan, asosan «S» va «D» seriyalarida to‘p suradi. Ana shu kamtarin jamoaning 34 yoshli darvozaboni Mauru Iguatu esa «V» seriyadagi sanoqli ishtiroki bilan maqtanishi mumkin, asosiy vaqtini turli shtatlar birinchiliklari va havaskor jamoalarda o‘tkazgan. Qarangki, bundan atigi yarim yil avval «Kampinense» safiga kelgan faxriy posbon o‘ta qisqa vaqt ichida murabbiy ishonchini qozonib, asosiy tarkib o‘yinchisiga aylandi va jamoaning «S» seriyaga ko‘tarilishiga munosib hissa qo‘shdi. O‘tgan haftaning dam olish kunlarida esa o‘yindagi ishonchli harakatlari va insoniylik fazilati evaziga Braziliya qahramoniga aylandi.
«Kampinense» va «Souza» o‘rtasidagi bellashuv kutilganidan ham qiziqarli va hayajonli tarzda o‘tdi. Boisi, u ikki autsayderning o‘zaro kuch sinashishi edi. Ortda qolgan 5-tur natijalaridan keyin maydon egalari atigi 2 ochkoga, boshqa guruhda to‘p surayotgan mehmonlar esa 7 ochkoga ega edilar. Tabiiyki, mehmonlar maydonga favorit maqomida tushdilar. Qo‘shimchasiga, mezbonlar uchrashuvni bosh murabbiysiz o‘tkazishga majbur bo‘lishdi - u koronavirus xastaligiga chalingani sababli, shogirdlarini boshqara olmasdi. Qisqasi, hatto mahalliy muxlislar ham uchrashuv «Souza» foydasiga hal bo‘ladi, degan fikrda edilar.
Biroq «Kampinense» bahsni yuksak shiddat bilan boshlab, dastlabki daqiqadayoq hisobni ochdi. Atigi 16 soniya ichida yo‘llangan Alanning kuchli zarbasi turnir tarixidagi eng tezkor golga aylandi. Ungacha 28-soniyada darvozani ishg‘ol etgan Rafael Longin rekord sohibi hisoblanardi.
Stadionga tashrif buyurgan kamsonli muxlislar quvonchini tushunish qiyin emas, yashin tezligidagi goldan keyin ularda suyukli jamoalarining zafar quchishiga umid uyg‘ondi. Maydon egalari ana shu umidni puchga chiqarmaslik uchun hujumni davom ettirdilar, bir nechta xavfli vaziyatlarni yaratdilar. Lekin o‘ta yaqin masofalardan ham aniq zarba yo‘llay olmadilar. To‘g‘ri, mehmonlar ham tomoshabin bo‘lib o‘tirganlari yo‘q, lekin bir qator xavfli vaziyatlardan ular ham foydalana olmadilar.
Tanaffusdan keyin maydondagi vaziyat o‘zgarmadi, bahs qarama-qarshi hujumlar ostida o‘tdi. Muvozanatni tiklash umidida oldinga tashlangan mehmonlar himoya-ni unutib, raqib hujumchisini e’tiborsiz qoldirishgandi. Biroq bu gal ham forvard qulay vaziyatni golga aylantira olmadi. Nihoyat, uchrashuv yakunlanishiga sanoqli daqiqalar qolganida, «Souza» penalti evaziga muvozanatni tikladi. Endi bor imkoniyatlarni hujumga sarflash navbati maydon egalariga keldi. Lekin bir nechta qulay vaziyatlar yana behuda ketdi.
Birozdan keyin mezbonlar darvozaboni kuchli zarb bilan to‘pni raqib jarima maydonchasi ichidagi jamoadoshiga yetkazib berdi. Dastlabki zarbani darvozabon qaytardi, takroriy zarbaga esa, darvoza to‘sini to‘siq bo‘ldi. «Kampinense» murabbiyi nima qilishini, o‘yinchilarga qanday ko‘rsatmalar berishni bilmay, boshi qotdi. O‘yin esa tobora nihoyasiga yaqinlashib borardi. Ana shu hayajonli pallada, ya’ni, qo‘shimcha vaqt tugashi arafasida «Kampinense» penalti tepish huquqiga ega bo‘ldi. Biroq navbatdagi «bosh og‘rig‘i»: penaltini kim amalga oshiradi? Hamma gap shundaki, avvalgi bir qator uchrashuvlarda jamoa penaltidan samara chiqara olmagan, bu bahsda esa «nuqta»dan yaqinroq masofadan yo‘llangan zarbalar ham noaniq bo‘lgandi. Boz ustiga, barcha futbolchilar charchab qolishgan... Mezbonlar murabbiyi o‘yinchilarni yoniga chorlaganida, hech kimdan sado chiqmadi. Nihoyat, Mauru Iguatu sukunatga barham berib, zarbani amalga oshirishini aytdi. Taajjubki, uzoq yillik faoliyatida biror marta bo‘lsada, «nuqta»dan to‘p tepmagan darvozabon bir qarashda oddiy ko‘rinadigan, lekin ayni pallada o‘ta qaltis vazifani o‘z zimmasiga oldi va qoyilmaqom tarzda darvozani ishg‘ol etdi!
2:1. «Kampinense»ning mavsumdagi dastlabki g‘alabasi. Shubha yo‘qki, Iguatu - bosh qahramon! Final hushtagi yangraganidan keyin, u o‘zini muxlis quchog‘iga otdi va birgalikda suratga tushdi. Tashkilotchilar esa Mauruni uchrashuvning eng yaxshi o‘yinchisi sifatida e’tirof etib, uni maxsus sov-rin bilan mukofotlashdi.
Ha, o‘yin nihoyasiga yetdi, ammo hikoyamiz davom etadi. O‘yindan keyin Iguatu uchrashuv va faoliyatidagi ilk goli taassurotlari bilan o‘rtoqlashar ekan, suhbatdoshi bo‘lgan Ana Flaviyani chorladi. Bunday faxrli sovringa munosib ko‘rishgani har qanday futbolchi uchun yoqimli ekanligi, lekin uni Ananing otasi - Edezioga sovg‘a qilishini jurnalistga tushuntirdi. Edezio o‘tgan yili kornavirusga chalingan va katta qiyinchilik bilan xastalikdan forig‘ bo‘lgandi. Edezio - «Kampinense»ning ashaddiy muxlisi edi va darvozabon shu tariqa uning ko‘nglini ko‘tarishga qaror qilgandi.
Mauruning oliyjanob qaroridan jurnalist qizning ko‘zlari yoshlandi, sovg‘a uning o‘zi uchun ham, otasi uchun ham juda muhim ekanligini ta’kidladi. Keyinchalik Ana Flaviya Mauru uning otasini qayerdan tanishi va nima uchun o‘z mukofotini unga sovg‘a qilganligini tushuntirib berdi. O‘tgan yil yozida Edezio Kovid-19 tashxisi bilan shifoxonaga yotqizilgan ekan. Uzoq vaqt davomida uning hayoti jiddiy xavf ostida turgani bois, shifokorlar sog‘ayib ketishiga kafolat berishmagan, palatadagi boshqa bemorlarning ko‘pchiligi olamdan o‘tishgan ekan. Lekin Edezio hayot-mamot jangida g‘olib chiqqan, bu borada «Kampinense» futbolchilarining Ana orqali yuborgan murojaatlari unga ruhiy kuch bag‘ishlagan. Maktubda ular Edezioga bu mavsum «S» seriyaga chiqishni va’da qilishgandi. Bunga ko‘pchilik muxlislar ishonmagan bo‘lishsada, jamoa o‘z va’dasini bajargan. Edezio esa shifoxonadan sog‘ayib uyiga qaytgach, o‘sha kuniyoq stadionga yo‘l olgan va yuqori ligaga talpinayotgan suyukli jamoasining o‘yinlarini o‘z ko‘zlari bilan ko‘rishga oshiqqan. Aynan shu sababli Mauru o‘z sovrinini Anaga berib, uni otasiga topshirishini iltimos qilgan. Edezio shu tariqa koronavirusga qarshi kurash ramziga aylandi. Shifokorlarga u doimo hech bo‘lmaganda bir marta stadionga borish orzusini ko‘p gapirgan ekan.
Braziliyalik muxlislar esa o‘yinchi o‘ziga berilgan sovrinni o‘sha onda muxlisga sovg‘a qilganiga futbol tarixida ilk bora guvoh bo‘lishganini ta’kidladilar. Bu ibratli voqea hech kimni - muxlislar, futbolchilar, murabbiylar, jurnalistlar va turnir tashkilotchilarini ham befarq qoldirmadi. Braziliyada futbolning muhim ahamiyatga ega ekanligi yana bir bor tasdiqlandi.
MUHAMMADSODIQ tayyorladi
