Rossiyalik futbol agenti Pavel Nesterov Sport24 muxbiri bilan suhbatda xorijda o‘ynashni istagan rossiyalik futbolchilar uchun qaysi chempionat yaxshi variant ekanini aytdi.

"Men bu masalada O‘zbekistonni ajratib ko‘rsatgan bo‘lardim. U yerda futbol darajadasi o‘smoqda, yangi yulduzlar paydo bo‘lmoqda, klublar ham yaxshi maosh to‘lamoqda. E’tiborli tomoni, legioner futbolchilarga maosh dollarda to‘lanmoqda. Osiyo chempionlar ligasida ishtirok etishni istagan o‘zbek klublari rossiyalik kuchli futbolchilarga oyiga 15-25 ming dollar to‘lashga tayyor, deb o‘ylayman.

Shuningdek, Ozarboyjon varianti ham bor. Bu mamlakatda ham bir nechta boy klublar bor. Armaniston varianti ham mavjud, ammo u yerdagi klublar boy emas. Qozog‘istonni ham aytishim mumkin, boz ustiga, bu davlatda rossiyalik futbolchilar legioner hisoblanishmaydi. Biroq Qozog‘istonning iqtisodiyoti Rossiyanikiga bog‘liq. Bundan tashqari, siyosiy vaziyat ham barqaror emas. Masalan "Qayrat" klubi xo‘jayini Qayrat Bo‘ranbayev hibsga olindi. Shu bois, qozoq klublari iqtisodiy jihatdan "o‘tirishi"ni kutyapman. Yaxshi pul to‘laydigan faqat 2-3ta jamoa qoladi.

Xulosa qiladigan bo‘lsa, O‘zbekiston, Qozog‘iston va Ozarboyjon chempionatlariga rossiyalik futbolchilarning o‘tishini kutish mumkin. Bular safiga Turkiya va Xitoy ligalarini ham qo‘shish mumkin.