Россиялик футбол агенти Павел Нестеров Sport24 мухбири билан суҳбатда хорижда ўйнашни истаган россиялик футболчилар учун қайси чемпионат яхши вариант эканини айтди.

"Мен бу масалада Ўзбекистонни ажратиб кўрсатган бўлардим. У ерда футбол даражадаси ўсмоқда, янги юлдузлар пайдо бўлмоқда, клублар ҳам яхши маош тўламоқда. Эътиборли томони, легионер футболчиларга маош долларда тўланмоқда. Осиё чемпионлар лигасида иштирок этишни истаган ўзбек клублари россиялик кучли футболчиларга ойига 15-25 минг доллар тўлашга тайёр, деб ўйлайман.

Шунингдек, Озарбойжон варианти ҳам бор. Бу мамлакатда ҳам бир нечта бой клублар бор. Арманистон варианти ҳам мавжуд, аммо у ердаги клублар бой эмас. Қозоғистонни ҳам айтишим мумкин, боз устига, бу давлатда россиялик футболчилар легионер ҳисобланишмайди. Бироқ Қозоғистоннинг иқтисодиёти Россияникига боғлиқ. Бундан ташқари, сиёсий вазият ҳам барқарор эмас. Масалан "Қайрат" клуби хўжайини Қайрат Бўранбаев ҳибсга олинди. Шу боис, қозоқ клублари иқтисодий жиҳатдан "ўтириши"ни кутяпман. Яхши пул тўлайдиган фақат 2-3та жамоа қолади.

Хулоса қиладиган бўлса, Ўзбекистон, Қозоғистон ва Озарбойжон чемпионатларига россиялик футболчиларнинг ўтишини кутиш мумкин. Булар сафига Туркия ва Хитой лигаларини ҳам қўшиш мумкин.