Fransiyalik sobiq yarim himoyachi va UYEFAning sobiq prezidenti Mishel Platini o‘z mamlakati terma jamoasidagi hozirgi holat haqida o‘z fikrlari bilan o‘rtoqlashdi.
«Men Deshamga to‘liq ishonaman. U jahon chempionatida g‘alaba qozonib, yaxshi mutaxassis ekanligini allaqachon isbotlab bo‘lgan, biroq men Zidanni Fransiya terma jamoasi bosh murabbiyi sifatida ko‘rishni istardim», — deya Platinining so‘zlaridan iqtibos keltiradi RMC Sport.
Platinining fikricha, «Real»ning sobiq bosh murabbiyi kuchli o‘yinchilardan iborat terma jamoaga ajoyib murabbiy bo‘lardi.
Eslatib o‘tamiz, 49 yoshli Zidan o‘tgan yilning may oyi oxirida «Real» bosh murabbiyligidan ketgandi. Mutaxassis «qaymoqranglilar»ga ustozi sifatida ikki marta Ispaniya chempionati va uch marta Chempionlar ligasida g‘olib chiqqan.