Germaniyaning «Bavariya» klubi futbolchisi Serj Gnabri nemis klubi bilan yangi shartnoma borasida kelisha olmayapti, deb xabar beradi Kicker nashri.

Manbaga ko‘ra, tomonlar bir necha oydan beri muzokara olib borishgan, biroq ular haligacha ijobiy natijaga erisha olishmayapti. Agar tomonlar kelisha olmasa, u holda «Bavariya» futbolchini joriy mavsum oxirida sotish yuborishi mumkin. Xabarlarga ko‘ra, Gnabri bonuslardan tashqari yiliga 15 million yevro ishlab olmoqchi.

Eslatib o‘tamiz, Gnabri 2017 yilda «Verder»dan «Bavariya»ga ko‘chib o‘tgan, shundan so‘ng u «Xoffenxaym»da bir yil ijarada o‘ynagan. Futbolchining myunxenliklar klubi bilan shartnomasi 2023 yilning iyuniga qadar mo‘ljallangan. Transfermarkt portalining ma’lumotlariga ko‘ra, futbolchining transfer narxi 70 million yevroni tashkil etadi.

Ta’kidlash joizki, Gnabri «Arsenal» tarbiyalanuvchisi sanaladi va 2013 yildan 2016 yilgacha «kanonirlar» tarkibida o‘ynagan.