O‘FA tomonidan so‘nggi paytlarda ayollar futbolini rivojlantirish, mavjud sharoit va kamchiliklarni o‘rganib borish hamda ularni bartaraf etish, tizimni isloh qilishga katta e’tibor qaratilmoqda. Ayollar futboli qo‘mitasi tashkil etilib, iste’dodli futbolchilar tarbiyalash, malakali murabbiy, shifokor va psixolog mutaxassislarni jalb etish, ularni barcha turdagi lisenziyaga bepul o‘qitish tizimi yo‘lga qo‘yildi. Osiyoda bu yo‘nalishda yetakchi mamlakat bo‘lmish Yaponiyadan mutaxassislar jalb etildi. Terma jamoalarga xorijiy yig‘inlar va kuchli raqiblar bilan o‘rtoqlik o‘yinlari muntazam tashkil etib kelinmoqda.

Xabaringiz bor, 9-12 aprel kunlari O‘zbekiston ayollar terma jamoasi AQSHda ikkita o‘rtoqlik uchrashuvi o‘tkazadi. O‘FA birinchi vise-prezidenti Ravshan Ermatov safar oldidan jamoa bilan uchrashdi.

“Birinchi navbatda, Amerika safari oldidan Assosiasiyamiz prezidenti Abdusalom Azizov nomidan barchangizga omad va oq yo‘l tilaymiz! Yaxshi ma’lumki, AQSH terma jamoasi amaldagi jahon chempioni hisoblanadi va tarixda eng ko‘p — 4 marta ushbu sovrinni qo‘lga kiritgan. Bu o‘rtoqlik o‘yinlari bizning jamoa uchun katta tajriba vazifasini o‘taydi. Chunki oldinda jiddiy musobaqalar bor va biz oldimizga yuqori maqsadlar qo‘yganmiz. Shu sababli terma jamoa boshqaruviga Midori Honda kabi malakali mutaxassis taklif etildi. Kuchli jamoalar bilan uchrashuvlar esa jamoamiz saviyasi oshishiga xizmat qiladi”, — dedi Ravshan Ermatov.