Yurgen Klopp «Liverpul» joriy mavsumda to‘rtta sovrinni qo‘lga kirita oladimi yoki yo‘qmi, degan savolga javob qaytardi.
«To‘rtta sovrin uchun kurashishning iloji yo‘q. Yaxshiyamki, biz bu mavsumda turnirlarni erta tark etmaslik borasida ancha muvaffaqiyatlimiz, lekin keling, taqvimimizga qaraylik.
Meni xavotirga solayotgan yagona o‘yin ertaga «Benfika»ga qarshi bo‘ladi. Shanba kuni biz «Manchester Siti» bilan (Angliya kubogi yarim finalida), keyin «Manchester Yunayted» va "Everton" (Premyer-ligada) bilan o‘ynaymiz. Agar ertaga muvaffaqiyatli o‘ynasak, Chempionlar ligasi yarim finalini kutishga to‘g‘ri keladi. BT Sport esa APL bilan o‘zaro kelishgan holda «Nyukasl» bilan mehmonda bo‘ladigan o‘yinni 12:30ga (Toshkent vaqti bilan 16:30 - muallif) belgilab qo‘ydi.
Hozirda «Liverpul» yaxshi o‘yin namoyish etmoqda, hamma bizning o‘yinlarimizni ko‘rishni istaydi va televideniyedagilar bizning jadvalimizga umuman ahamiyat bermaydilar. Bu normal holat emas.
Aytaylik, ertaga g‘alaba qozonib, turnirning keyingi bosqichiga yo‘l oldik. Menga dunyoning istalgan boshqa ligasini ko‘rsating, u yerda teleradiokompaniyalar yarim finalda o‘ynaydigan jamoaning o‘yinlarini (Angliyada esa 2-3 marta bo‘lishi mumkin) soat 12:30ga belgilaydimi. Bu nima degani? Nima qilyapsizlar o‘zi? Nima uchun?
Shuning uchun har bir turnirda g‘alaba qozonish juda qiyin. Chunki bunday narsalar hech kimni qiziqtirmaydi" - deb g‘azablandi «Liverpul» bosh murabbiyi.
