Gana terma jamoasi futbolchisi Andre Ayyu JCH-2010dagi Luis Suaresning hatti-harakatlari haqida fikr bildirdi.
Chorak final o‘yinining qo‘shimcha taymida Suares to‘pga qo‘li bilan zarba berib, Urugvay terma jamoasi darvozasiga kirib ketayotgan to‘pni qaytarib qolgandi. Hakam hujumchiga qizil kartochka ko‘rsatib, Gana terma jamoasi foydasiga penalti belgiladi. Asamoa Gyan 11 metrlik zarbani noaniq amalga oshirgan va Gana penaltilar seriyasida mag‘lubiyatga uchragandi.
“Avval ham aytganimdek, balki uning o‘rnida bo‘lganimda ham shunday qilgan bo‘lardim.
To‘g‘ri, u bizni o‘ldirdi, bizning orzumizni o‘ldirdi, u afrikaliklarning orzusini o‘ldirdi va biz hammamizda yarim finalga chiqqan birinchi Afrika davlati bo‘lishimizga to‘sqinlik qilganini his qilamiz. Bu alam abadiy qoladi.
Lekin bu ishni millati uchun qildi, qaror chiqardi, bu ish yuzasidan orqaga qaramaslik kerak. Biz yaxshi o‘ynashni va Qatardagi jahon chempionatida muvaffaqiyat qozonishga harakat qilishni istaymiz” - dedi Qatarning “As-Sadd” va Gana terma jamoasi yarim himoyachisi.
