Argentinalik mutaxassis Matias Almeyda AQSHning «San-Xose» klubi bosh murabbiyi lavozimini tark etdi. Bu haqda MLS klubi rasmiy sayti xabar bermoqda. U bilan birga Umar Zarif, Benjamin Galindo va Karlos Roalar ham murabbiylar shtabini tark etishdi.

Aleks Kovelo bosh murabbiy vazifasini bajaruvchi etib tayinlandi. Bungacha 43 yoshli ispaniyalik mutaxassis «San-Xose»ni ikkinchi jamoasini boshqargan. Uning murabbiylar shtabiga «San-Xose» safida 401 ta o‘yin o‘tkazib, 176 ta gol va 39 ta golli uzatmani amalga oshirgan klub afsonasi Kris Vondolovski ham kiritilgan.

Joriy mavsumda «San-Xose» Matias Almeyda boshchiligida 7 ta o‘yin o‘tkazdi, 4 ta mag‘lubiyat va 3 ta durang qayd etdi. Jamoa chempionatda eng ko‘p gol o‘tkazib yubordi - 17 ta. G‘arbiy konferensiyada «San-Xose» oxirgi o‘rinda bormoqda.