Italiya chempionatining 35-turi doirasida «Yuventus» o‘z uyida «Venesiya»ni qabul qilib, qiyin g‘alabaga erishdi.

Birinchi bo‘limda turinliklar tashabbusni o‘z tomonlarida ushlab turishdi. Bahsning 7-daqiqasida mezbonlar qanotdan jarima zarbasini amalga oshirishdi. Matteys de Legt jarima maydoniga yetkazilgan to‘pni bosh bilan darvoza yaqiniga yetkazdi. Bonuchchi yaqin masofadan hisobni ochdi.

Ikkinchi bo‘limda mehmonlar Aramuning goli evaziga hisobni tenglashtirishdi. Ammo oradan 5 daqiqa o‘tib yana o‘sha Leonardo "Yuve"ni hisobda oldinga olib chiquvchi gol muallifiga aylandi. Bu safar burchakdan tup uzatilgach berilgan zarbani darvozabon qaytardi. Bonuchchi esa darvoza chizig‘i oldidan to‘pni darvozaga joylab qo‘ydi.

«Yuventus» ushbu g‘alaba tufayli o‘z ochkolarini 69taga yetkazdi va jamoa endi A seriyada amalda 4-pog‘onadan pastga tushib ketmaydi.

Italiya A seriyasi, 35-tur
Yuventus – Venesiya 2:1 (1:0, 1:1)
Gollar: 1:0 – 7 Bonuchchi, 1:1 – 71 Aramu, 2:1 – 76 Bonuchchi.
Yuventus – Shchensni, Bonuchchi, Danilo, de Ligt, Pellegrini (Aleks Sandro, 58), Rabyo, Zakariya, Miretti (Artur, 79), Bernardeski (Dibala, 58), Morata (Kin, 69), Vlaxovich (Kyellini, 79).
Venesiya – Myayenpyaa, Mateyu (Okereke, 86), Kaldara, Chekkaroni, Ampadu, Xaps (Ullmann, 86), Vakka (Fyordilino, 37), Chrnigoy (Peres, 64), Kyuizans (Kiyin, 46), Aramu, Anri.
Ogohlantirishlar: Zakariya (25), Pellegrini (45), Kiyin (56), Aramu (61), Aleks Sandro (63), Xaps (78).