Gresiyaning Iraklion shahrida davom etayotgan og‘ir atletika bo‘yicha yoshlar o‘rtasidagi Jahon chempionati bugun o‘z nihoyasiga yetadi.

Hozirgina erkaklar o‘rtasida +109 kg vazn toifasida dast ko‘tarish mashqi yakuniga yetdi. Unda hamyurtimiz Mirhosil Mirzaboyev 176 kg natija bilan kichik kumush medalga sazovor bo‘ldi. U dastlab 165 kg, ikkinchi urinishida esa 170 kg toshni osonlik bilan ko‘tardi. So‘nggi urinishda Mirzaboyev biroz qiynalgan bo‘lsada, 176 kg og‘irlikni ham o‘ziga bo‘ysundirishga muvaffaq bo‘ldi.

Biroq, eronlik Ali Rizo Yusufiy hamyurtimizdan bir qadam oldinda yurdi. U 166, 171 va nihoyat 177 kg og‘irlikni zabt etdi va kichik oltin medalni qo‘lga kiritdi.

Sovrindorlar uchligini ukrainalik Bogdan Taranenko yakunlab berdi, uning ko‘rsatkichi 167 kg bo‘ldi.

Oldinda esa sportchilarni siltab ko‘tarish mashqi kutib turibdi. Bu yo‘nalishda hamyurtimizga omad tilaymiz.