Xabaringiz bor, ayni kunlarda Osiyo futbol konfederasiyasi Prezidenti boshchiligidagi delegasiya mamlakatimizda bo‘lib turibdi.

Bugun kunning birinchi qismida Shayx Salmon bin Ibrohim al Xalifa Toshkent viloyatida terma jamoalar uchun qad rostlayotgan Do‘stlik bazasini ko‘zdan kechirish uchun qurilish maydoniga tashrif buyurdi.

O‘FA birinchi vise-sprezidenti Ravshan Ermatov mazkur bazadan o‘rin olgan ob’ektlar, xususan, futbolchilar istiqomad qilishi uchun mo‘ljallangan mexmonxona, mashg‘ulot maydonchasi va zallari, stadion loyihasi haqida ma’lumot berdi. Shuningdek, zamonaviy uskunalar bilan jihozlanadigan tibbiy-tiklanish markazi, kutubxona, restoran, yashil hudud kabi obektlarning aynan ushbu bazadan joy olishi aytildi.

Avvallari terma jamoalar uchun baza qurish orzu bo‘lgani, endilikda mana shu loyiha natijasida barcha yosh toifasidagi terma jamoalarimiz, xususan, milliy va olimpiya jamoasi ham shu yerda yig‘in o‘tkazish imkoniga ega bo‘lishi ta’kidlandi. Bundan tashqari, mazkur futbol shaharchasidan 11-17 yoshgacha bo‘lgan 6 ta yosh toifasidagi akademiya tarbiyalanuvchilari tahsil olishi qayd etildi.

O‘z o‘rnida OFK Prezidenti ham mazkur qurilish-loyihasi haqida ijobiy fikrda ekanligini aytib, bir nechta masalalar yuzasidan o‘zining takliflarini bildirdi.