Xorvatiyalik himoyachi Ivan Perishich o‘zining yangi klubi - "Tottenxem" Chempionlar ligasi yo‘llanmasidan mahrum bo‘lib qolmasligiga ishonch hosil qilish uchun Premyer-liga mavsumi yakunini diqqat bilan kuzatib borganini tan oldi.

Seshanba kuni ertalab "Inter" klubini tekinga tark etgan Perishich "Tottenxem"  bilan ikki yillik shartnoma imzolaganini e’lon qildi.

Ivan nihoyat Premyer-ligadagi orzusini ro‘yobga chiqarishidan va yana bir bor "Inter"da A seriyada g‘alaba qozongan "shporlar" bosh murabbiyi Antonio Konte bilan ishlashdan xursand.

33 yoshli xorvat ham may oyi boshida “Tottenxem”ning “Arsenal” ustidan qozongan g‘alabasidan (3:0) so‘ng, “shporlar” Premyer-liganing top-4ligiga kirishiga shubha qilmaganini tan oldi.

"Murabbiy va sport direktori yonimga kelganida, 2009 yili Belgiyada professional tarzda o‘ynay boshlaganimdan beri Premyer-ligaga kelishni juda xohlayotganimni aytdim.

Antoniodek murabbiy bilan ishlash sharaf. Uni yana ko‘rganimdan juda xursand bo‘ldim. U har daqiqa, har soat va har kuni futbol bilan yashaydi, hatto uxlayotganida ham futbol haqida o‘ylaydi.

Men "shporlar"ning so‘nggi ikki yoki uchta o‘yinini ko‘rdim va "Arsenal"ni mag‘lub etgandan so‘ng, "Tottenxem" Chempionlar ligasiga chiqishi aniq edi. Bu men uchun yaxshi bo‘ldi, chunki men eng kuchli jamoalarga qarshi o‘ynashni xohlayman", - dedi Perishich The Independent bilan suhbatda.