Voqealar rivojiga ko‘ra Benzema mavsum boshidayoq ko‘plab muxlislar tomonidan «Oltin to‘p»ga loyiq ko‘rila boshlagan edi. Uning sermahsul o‘yinlari sabab «Real» bugungi muvaffaqiyatlarga erisha oldi. Aks holda, Karlo Anchelotti jamoasi mutlaqo boshqacha mavsum o‘tkazgan bo‘lishi mumkin edi. Biroq, Benzema sabab hammasi hozirgi ko‘rinishga keldi. U «Real»ni imkonsizdek ko‘ringan vaziyatlardan olib chiqib keta oldi. Shunga qaramay, «Oltin to‘p» borasida hali hech narsa ma’lum emas. Biz esa bu borada Benzemaga raqobat qilmoqchi bo‘lgan beshta futbolchini keltirib o‘tamiz.
Sadio Mane
Mane qishda terma jamoasi safida Afrika chempionligiga erishgandi. U shuningdek, o‘z jamoasini Jahon chempionatiga olib chiqdi. «Liverpul» safida esa Angliya kubogi hamda liga kubogiga ega chiqdi. Yurgen Klopp jamoasi har bir frontda fantastik harakat qildi. Bunda esa Mane ham jonbozlik ko‘rsatdi. Senegallik hujumchi mavsum davomida jami 43 ta o‘yin o‘tkazib, 21 ta golga mualliflik qilgan. Shu sababli uni da’vogarlar safiga qo‘shdik.
Kevin De Bryuyne
Shubhasiz, «Manchester Siti»ning eng yaxshi o‘yinchisi nomiga loyiq inson Kevin edi. Yakunda esa shunday ham bo‘ldi. Pep Gvardiola jamoasining eng kreativ futbolchisi aynan belgiyalik hisoblanadi. Ammo yarim himoyachi bu bilan cheklanib qolmagan. U gol urishni ham yaxshi biladi va yaxshi ko‘radi. De Bryuyne jamoasi Angliya chempionligini yana bir bor qo‘lga kiritdi. Ammo YECHLda «Real» to‘sig‘idan o‘ta olmadi. Biroq, De Bryuyne o‘z an’analariga sodiq qolgan holda doimgidek o‘ynashda davom etdi. Uning hisobida mavsum davomida 17 ta gol hamda 13 ta assist bor edi.
Robert Levandovski
Levandovskiga kelganda 2020 yilgi «Oltin to‘p» topshirish marosimi koronavirus sababli bekor qilingan edi. Ammo o‘sha yili polshalik hujumchi fenomenal o‘yin ko‘rsatgan edi. Ha, «Bavariya» YECHLda kutilmagands «Vilyarreal» bilan bahsda qoqildi. Biroq, Bundesligani qo‘lga kiritdi. Boz ustiga, Levandovskining bu mavsumdagi natijalari ham har doimgidek zo‘r. 33 yoshli hujumchi 43 ta o‘yinda jami 50 ga yaqin gol urishga erishdi. Bu esa uni «Oltin to‘p» borasidagi imkoniyatlarini yaxshilaydi.
Kilian Mbappe
Fransuz futbolchisi uchun bu mavsum ham individual yo‘nalishda yaxshi kechdi. Ammo «PSJ» faqatgina Fransiya chempionatida zafar qucha oldi, xolos. Mbappe darajasidagi futbolchi esa bundan ham ko‘prog‘iga loyiq edi. Biroq u o‘z o‘yinini ko‘rsatishda davom etmoqda. 23 yoshli futbolchining statistikasi uni «Oltin to‘p»ga bemalol da’vo qilishini ta’minlaydi. U shuningdek, Qatardagi Jahon chempionatining ham eng katta yulduzlaridan biri bo‘lishi tayin.
Muhammad Saloh
Muhammadda ham ayni damda Manedagiga o‘xshash holat kuzatilmoqda. Ajoyib mavsum, ajoyib natijalar va ajoyib sport formasi. Ammo «Liverpul»ning sovrin yutish borasidagi ishlari yaxshilanmay qoldi. Saloh mavsumni 33 ta gol hamda 15 ta assist bilan yakunlagan edi. Finalda mag‘lub bo‘lganiga qaramasdan, Saloh Karim Benzemaga eng kuchli raqobat qiladigan nomzod bo‘lishi kutiladi. Harxolda, u Angliyada eng yaxshi to‘purar bo‘la oldi.
ISMATOV J.
