Bir necha hafta oldin "Liverpul" o‘ziga xos yutuq - bir mavsumda to‘rtta sovrinni qo‘lga kiritgan klub nomiga da’vogarlik qilayotgan edi. Biroq Yurgen Klopp shogirdlari buni uddalay olmadi – Chempionlar ligasi finalida “Real”ga mag‘lub bo‘ldi, shuningdek, APLdagi chempionlik uchun kurashda “Manchester Siti”ga imkoniyatni boy berdi.
Endi “Liverpul” oldida yana bir muammo turibdi - jamoaning ikki asosiy yulduzi va hujumkor o‘yinchilari hisoblangan Muhammad Saloh va Sadio Maneni saqlab qolish. Ikkalasi ham tez orada klubni tark etishi mumkin. Hozir biz sizlaraga nima uchun bu sodir bo‘layotganini va "Liverpul" o‘z yetakchilarini saqlab qolish uchun qanday imkoniyatlarga ega ekanligini haqida biroz ma’lumot beramiz.
Saloh ketadimi?
Muhammadning "Liverpul" bilan shartnomasi 2023 yilning yozida tugaydi va hozircha tomonlar hamkorlikni uzaytirish borasida kelishib olishmagan. Futbolchiga hozirda “Manchester Siti”, “Chelsi” va “Manchester Yunayted” kabi klublar qiziqish bildirmoqda. Daily Mirror nashri xabariga ko‘ra, agar mersisaydliklar rozi bo‘lsa, u shartnomasi yakunlanganidan keyin "Barselona" rahbariyatiga ko‘chib o‘tish uchun va’da bergan.
The Athletic nashri xabariga ko‘ra, “qizillar” va misrlik futbolchi dekabr oyidan beri muzokara olib bormayapti, chunki hujumchi keyinchalik boshqa klubga o‘tishi mumkinligini inkor qilmagan. Nashrning yozishicha, klub yaqinda Salohga maoshi 15 foizga ko‘tariladigan yangi shartnoma taklif qilgan (hozirda haftasiga 220, qo‘shimcha bonuslar bilan hisoblaganda 250 ming funt oladi). Bu taklif futbolchiga yoqmadi - uning fikricha, bunday summa dunyoning eng yaxshi futbolchilaridan biriga to‘g‘ri kelmaydi. Mish-mishlarga ko‘ra, Saloh haftasiga 300 dan 500 ming funtgacha maosh olmoqchi.
"Anig‘ini bilmayman. O‘ylaymanki, muxlislar nima istayotganimni yaxshi bilishadi, lekin shuni aytishim mumkinki, gap pulda emas. "Liverpul" men uchun juda katta ahamiyatga ega bo‘lgan klub hisoblanadi. Bu yerda futboldan zavq olaman va klub uchun borimni berishga tayyorman. Mening oilam shu yerda” — deydi Muhammad.
May oyida Saloh yangi shartnoma bo‘yicha muzokaralar qanday yakunlanishidan qat’i nazar, yana bir mavsumni "Liverpul"da o‘tkazishiga va’da berdi. Ammo uning kelajagi noaniqligicha qolmoqda.
Mane ketadimi?
Salohdan farqli o‘laroq, Mane imkon qadar tezroq "Liverpul"ni tark etishga harakat qilmoqda. The Telegraph nashrining yozishicha, Sadio umuman yangi shartnoma bo‘yicha muzokaralar olib bormayapti va jamoani tark etishini klub rahbariyatiga ochiq aytgan. Katta ehtimol bilan senegallik futbolchi faoliyatini "Bavariya"da davom ettiradi. Sababi, myunxenliklar anchadan beri Sadio borasida “qizillar” bilan muzokara olib bormoqda. Sport1.de nashri xabariga ko‘ra, nemis klubi Manega "Liverpul"ga qaraganda ko‘proq, soliqlarni hisobga olmaganda 20 million yevro maosh to‘lashga tayyor.
Manening o‘zi ham ketishga bir necha bor shama qildi. Yaqinda bo‘lib o‘tgan matbuot anjumanida unga shunday savol berildi:
“Onlayn ovoz berish natijalariga ko‘ra, senegalliklarning 70 foizi sizning "Liverpul"dan ketishini xohlayotganiga qanday munosabat bildirasiz?”.
“Men ular xohlagan narsani qilaman. Tez orada hammasiga to‘liq javob beriladi”, - deydi Mane.
Ma’lum bo‘lishicha, Maneni jurnalistlar noto‘g‘ri tushunishgan. Keyinchalik, Sadio bu savolga hazil bilan javob berganini va "Liverpul"ni juda hurmat qilishini aytdi. Biroq uning yaqin orada ketishi haqidagi mish-mishlar to‘xtagani yo‘q.
So‘nggi yillarda "Liverpul" doimiy ravishda Takumi Minamino, Diogo Jota va Luis Diasning transferlari hisobiga hujum chizig‘ini kuchaytirib bordi. Ammo klub tez orada transfer bozoridan kamida yana bitta qanot hujumchisi izlashiga to‘g‘ri kelishi ehtimol katta.
Ha, do‘stlar! Mane - Firmino - Salohning afsonaviy triosi asta-sekin tarixga aylanib bormoqda.
