«Brayton» himoyachisi Mark Kukurelya bir vaqtning o‘zida Angliya premyer-ligasining naq uch top-klubi qiziqish doirasiga tushgan, deya xabar beradi Goal.

Gap «Manchester Siti», «Chelsi» va «Tottenxem» haqida ketmoqda. 23 yoshli himoyachi 2021/22 yilgi debyut mavsumini «Brayton»da o‘tkazdi va 38 ta o‘yin o‘tkazib, 2 ta golli uzatmani amalga oshirdi.

Ispaniyalik futbolchi «Barselona» tarbiyalanuvchisi va bir mavsumni «Xetafe»da o‘tkazishga ham muvaffaq bo‘ldi. Britaniyaning Goal nashri xabariga ko‘ra, «Brayton» transfer uchun ingliz futboli yetakchilaridan kamida 50 million yevro talab qilmoqda.

Eslatib o‘tamiz, futbolchi Ispaniyaning kattalar terma jamoasi safida bor-yo‘g‘i bitta o‘yin o‘tkazgan – 2021 yilda Litvaga qarshi (4:0). O‘shandan beri u boshqa terma jamoaga chaqirilmadi.