23 yoshgacha bo‘lgan futbolchilar o‘rtasidagi Osiyo chempionatining chorak final bosqichi doirasida bo‘lib o‘tgan O‘zbekiston va Iroq jamoalari o‘rtasida yuz bergan tartibsizliklar yuzasidan OFK tartib-intizom qo‘mitasi qaror chiqarganidan xabaringiz bor.

Qarorga ko‘ra, musobaqaning yarim final bosqichidan o‘rin olgan O‘zbekiston - Yaponiya uchrashuviga o‘zbekistonlik muxlislar kiritilmaydi, O‘zbekiston futbol assosiasiyasi esa 50 ming AQSH dollari miqdorida jarima to‘laydi.

Shuningdek, Iroqqa qarshi o‘yinda maydondan chetlatilgan Abduvohid Ne’matov 3ta o‘yinga diskvalifikasiya qilindi. U Yaponiyaga qarshi bahsdan tashqari, musobaqadagi so‘nggi o‘yin (final yoki 3-o‘rin uchun bahs)ni ham o‘tkazib yubordi. Uning bitta diskvalifikasiyasi keyingi musobaqaga o‘tkaziladi.

Bundan tashqari, OFK "Nasaf" darvozaboniga 500 dollar miqdoridagi jarima soldi. Ushbu summaning 125 dollari 90 kun ichida to‘lanishi kerak. Qolgan 375 dollari shartli bo‘lib, Ne’matov ikki yil davomida yana shunday qoidabuzarlikka yo‘l qo‘ysa, jarimaning qolgan 375 dollarini ham to‘lashi kerak bo‘ladi.

OFK Abduvohidni, agar shunday qoidabuzarlikka takroran yo‘l qo‘yadigan bo‘lsa, yanada jiddiyroq jazoga tortish haqida ogohlantirdi.