Rossiyaning «Ufa» klubi sobiq bosh murabbiyi Aleksey Stukalov «Match TV»ga bergan intervyusida yarim himoyachi Oston O‘runov haqida to‘xtalib o‘tdi.

— Ushbu mavsumda O‘runov bilan ishlash qiyin kechdimi?
— Yangi yilga qadar, ha, qiynaldik. Hozir esa u to‘g‘ri yo‘lga tushib oldi.

— Bu jarayon juda og‘ir kechdimi?
— Ha. Uning maoshida keskin pasayish yuz berdi. Masalan, menda yoki sizda bunday holat bo‘lmagan bo‘lishi mumkin. Shuning uchun biz buni tushuna olmaymiz. Bunday holatni boshidan kechirgan inson buni oson yengib o‘tgan bo‘lardi.

U jamoaga kerak edi. Shuning uchun uning rivojlanishi uchun yo‘l topishga harakat qildik. Yangi yilga qadar hech narsa o‘xshamadi. Shunday paytlar bo‘ldiki, men Shamil Gazizovga: «Bo‘ldi, yetadi, men undan charchadim. Uni nimadir qilish kerak», dedim.

— U bilan ko‘p gaplashdingizmi?
— Deyarli har kuni. Murabbiylar shtabi bilan turli yo‘llarni qilib ko‘rdik. Hattoki unga o‘zining avvalgi o‘yinlarini ko‘rsatib, hozirda qanday ahvolda ekanini tushuntirdik. Ammo jarohatlar ham uni qiynab qo‘ydi. Oyog‘ining orqa qismidagi mushaklar jarohatlandi. Shuning uchun inson o‘zini nazoratda ushlab turishi kerak. Uning mushaklari juda kuchli. Oston bitta o‘yinda juda ko‘p sprinterlik vazifasini bajaradigan RPLdagi kam sonli futbolchilardan biri.

— Unga nisbatan qattiqqo‘lroq bo‘lishga harakat qilmadingizmi?
— Hozirgi futbolchilar boshqacha. Istalgan paytda xafa bo‘lib qolishi mumkin. Murabbiy yoki boshqa mutaxassis futbolchiga qanday gapirishni aniq bilishi kerak. Bu qiyin vaziyat.

— O‘runov hammasini tushundim, deya, keyin kafega yo‘l olarmidi?
— Gap kafeda emas, tayyorgarlikda. U mashg‘ulotdan tashqari yana alohida ham ishlashi kerak. O‘runovning tiklanishi uchun Artur Karimov ko‘p ish qildi. Oston esa bunday keyin ham mashg‘ulotdan so‘ng ko‘p ishlashi zarur.

— O‘runov bundan bo‘yin tovladimi?
— Yo‘q, bunaqasi bo‘lmadi. Murabbiylar shtabi hech kimning bunday qilishiga yo‘l qo‘ymaydi. Murabbiyning so‘zi — qonun.