"Manchester Yunayted" hujumchisi Krishtianu Ronaldu faoliyatini "PSJ"da davom ettirishi mumkin, deya xabar bermoqda jurnalist Pedro Almeyda o‘zining Twitter sahifasida.
Manbaga ko‘ra, Fransiya klubi futbol maslahatchisi Luis Kampos Ronalduning agenti Jorje Mendez bilan ehtimoliy transfer borasida muzokaralar olib bormoqda.
Oldinroq Ronaldu jamoa bilan Tailandga mavsumoldi turnega uchmasligi ma’lum bo‘lgandi. Shuningdek, portugaliyalik hujumchi “Manchester Yunayted”ning bir nechta mashg‘ulotlarni o‘tkazib yubordi.
Ronaldu “Manchester Yunayted”da 2021 yildan buyon to‘p tepadi. Uning klub bilan shartnomasi 2023 yilgacha mo‘ljallangan. Krishtianu o‘tgan mavsumda barcha turnirlarda 38 ta o‘yinda maydonga tushib, 24 ta gol va 3 ta golli uzatmaga mualliflik qilgan.
