Yaqinda "Andijon" safiga tajribali futbolchi Suhrob Berdiyev qo‘shilgani to‘g‘risida xabar berib o‘tgandik.
Klub va futbolchi o‘zaro kelishuvga erishdi. Shu bois Suhrob Berdiyev bilan shartnoma imzolanganini ma’lum qilamiz. Endilikda ushbu o‘yinchi jamoa a’zosiga aylandi.
Suhrob Berdiyev haqida ma’lumot beradigan bo‘lsak, u 1990 yil 12 aprel sanasida Toshkent shahrida tavallud topgan.
Professional faoliyatini 2006 yili “Lokomotiv” klubida boshlagan. 2010 yilda “Olmaliq” jamoasiga ko‘chib o‘tadi. U yerda bir necha mavsum faoliyat ko‘rsatgach, 2013 yili “So‘g‘diyona” a’zosiga aylanadi. Jizzaxda ikki yil to‘p surgan futbolchi 2015 yilda “Sho‘rtan”ga ko‘chib o‘tdi. Bir yildan keyin esa “Paxtakor” a’zosiga aylandi. U yerda bir davra to‘p surgach, 2016 yilning ikkinchi davrasidan “Qo‘qon-1912” jamoasiga o‘tgan holda ushbu klubda 2021 yilgacha to‘p surdi. Joriy mavsumning birinchi davrasini esa “Yangiyer” klubida o‘tkazdi.
