"Ufa" klubi bosh direktori Shamil Gazizov o‘zbekistonlik yarim himoyachi Oston O‘runov tez orada yuqori saviyaga chiqishiga umid bildirdi.

"Oston men bilan ishlagan futbolchilar orasida eng iqtidorlisi hisoblanadi. U ilk marta jamoamizga kelganida uning iqtidoriga hech kimda shubha bo‘lmagan. Uning "Ufa"dagi faoliyati juda omadli chiqdi. Meni "Spartak" klubiga taklif qilishganida, uni o‘zim bilan olib ketish varianti bor edi. "Spartak" xo‘jayini Leonid Fedun ham uni jamoada ko‘rishni istadi va transferni hal qildik. Ochig‘ini aytsam, 1 mln. yevro — bu katta summa emas. O‘sha paytda O‘runov uchun boshqa jamoalar ham kurash olib borishayotgandi. Men esa o‘z jamoamda shunday futbolchi bo‘lishini istagandim. Uning darajasi jiddiy ekanini tushunib yetgandim.

Keyin nima bo‘ldi? Har bir futbolchi ham jiddiy sinovlar va pul bilan bog‘liq masalalarga dosh bera olmaydi. Bunday sinovni ham bosib o‘tish kerak. Oston esa oddiy o‘zbek oilasi farzandi. Bo‘lib o‘tgan voqealar unga bosim o‘tkazdi. Hechqisi yo‘q, tez orada u juda yaxshi saviyaga chiqib oladi, deb o‘ylayman", - dedi Gazizov.

Ma’lumot o‘rnida. "Spartak" Oston O‘runovni sotib yuborishni istamoqda. Ammo o‘zbekistonlik futbolchining transferi va maoshini to‘lay oladigan jamoa hozircha topilmadi.