"Уфа" клуби бош директори Шамиль Газизов ўзбекистонлик ярим ҳимоячи Остон Ўрунов тез орада юқори савияга чиқишига умид билдирди.

"Остон мен билан ишлаган футболчилар орасида энг иқтидорлиси ҳисобланади. У илк марта жамоамизга келганида унинг иқтидорига ҳеч кимда шубҳа бўлмаган. Унинг "Уфа"даги фаолияти жуда омадли чиқди. Мени "Спартак" клубига таклиф қилишганида, уни ўзим билан олиб кетиш варианти бор эди. "Спартак" хўжайини Леонид Федун ҳам уни жамоада кўришни истади ва трансферни ҳал қилдик. Очиғини айтсам, 1 млн. евро — бу катта сумма эмас. Ўша пайтда Ўрунов учун бошқа жамоалар ҳам кураш олиб боришаётганди. Мен эса ўз жамоамда шундай футболчи бўлишини истагандим. Унинг даражаси жиддий эканини тушуниб етгандим.

Кейин нима бўлди? Ҳар бир футболчи ҳам жиддий синовлар ва пул билан боғлиқ масалаларга дош бера олмайди. Бундай синовни ҳам босиб ўтиш керак. Остон эса оддий ўзбек оиласи фарзанди. Бўлиб ўтган воқеалар унга босим ўтказди. Ҳечқиси йўқ, тез орада у жуда яхши савияга чиқиб олади, деб ўйлайман", - деди Газизов.

Маълумот ўрнида. "Спартак" Остон Ўруновни сотиб юборишни истамоқда. Аммо ўзбекистонлик футболчининг трансфери ва маошини тўлай оладиган жамоа ҳозирча топилмади.